1\6 من سفاحين إلى رؤساء جمهورية دايماً منحكي إنه السياسيين عنا مجرمين وسفاحين، بس في ناس بتفكر إنه هيدا كلام مجازي. بس الحقيقة غير هيك. من هيك نحنا يمكن منغص بالوجع على الـ 220 شهيد يللي راحوا بمجزرة تفجير المرفأ، بس بالنسبة إلن، هيدا رقم ما شي. يمكن بحساباتن فراطة.
2\6 في منتصف حزيران من 1957 وعلى أبواب انتخابات ساخنة، قام شب نص متعلّم بس طموح وكتير بحب بلده إسمه سليمان فرنجية ومعه شب تاني كتير مرتب إسمه رينيه معوّض بقيادة عصابة أشرار وقتل 32 مصلي داخل كنيسة على خلفية خلافات سياسية مع بيت الدويهي وكرم. عملوا عملتن وهربوا على سوريا.
3\6 بس وصل الرئيس العادل الآدمي الشريف الطاهر النضيف فؤاد شهاب على الرئاسة، طلع عفو عن أصحابه وحليفيه المجرمين ورجعوا على لبنان وكأن شيئاً لم يكن. واحد صار رئيس جمهورية بالـ 1970 وحمل لبنان على الخراب. والتاني صار رئيس جمهورية بالـ 1989 وتكحّل دغري على عيد الإستقلال 1989.
4\6 تنين مجرمين سفاحين قتلوا ناس عم يصلوا بأمان ربن داخل كنيسة. في أكتر من هيك إجرام؟ أكيد لأ. شو كان العقاب؟ عفو عام من الرئيس صاحبن يللي عمل دولة لبنان المؤسسات والعدالة (هو كان خزمتجي عند عبد الناصر). والعقاب الأكبر؟ صاروا رؤسا جمهورية ببلد ما بحياته كان جمهورية.
5\6 سليمان فرنجية عطانا حفيده سليمان يللي ما بيعرف يقرا ويكتب بس بيعرف يحمي مناطقه، ويللي عطانا إبنه طوني يللي رح يحمل لواء التغيير على شاكلة ميشال المر. ورينيه (ومرته نايلة) عطانا إبنه ميشال معوض حامل لواء التغيير ومعارضة من الداخل ومصاري الـ USAID
6\6 بالخلاصة، وين ما بدك تضرب إيدك مع هالطبقة الحاكمة ما رح يطلعلك إلا مجرمين وسفاحين وسراقين ونصابين. أوادم بهالطبقة السياسية ما في. دولة وعدالة وقانون بلبنان قبل الحرب وبعد الحرب ما كان في. من هيك ما حدا فارقة معه لا شهدا لا ضحايا ولا ناس ولا بلد. ما في شي غير سلطة ومال.
بونس (1): الرئيس سليمان فرنجية عطانا حفيده سليمان وإبن حفيده طوني بس ما عطانا إبنه لأن الكتائب \القوات قتلوا طوني بمجزرة إهدن مع مرته وبنته يللي عمرا سنتين وفوق التلاتين شخص. آه ونسيت خبركن، جعجع كان قائد فرقة الإعدام (سبحان الله ولا مرة كان قائد شي فريق طبي أو هندسي أو شي مفيد)
بونس (2) متل العادة بس يكون في جريمة كتير بشعة، سمير جعجع ما خصه. حتى وهو عم يقود فرقة إعدام رايحة ترتكب مجزرة قال ما دخله. قال شو؟ غاب عن الوعي أثناء العملية 😂😂😂 يا محلا نواب حزبالة بس يفوتوا على الحمام بالإجتماعات المصيرية متل إجتماع لجنة المال. رهيبين زعماءنا 😇
